मूल, प्रतिनिधी :
मूल शहरात गेल्या दोन ते तीन वर्षांत गुन्हेगारीची मालिका वाढत चालली असून, शहरातील कायदा-सुव्यवस्थेचा विषय गंभीर बनला आहे. सलग दोन टर्म सत्ता भोगूनही सत्ताधारी भाजपकडून गुन्हेगारीवर प्रभावी नियंत्रण प्रस्थापित करण्यात अपयश आल्याची नागरिकांमध्ये तीव्र भावना व्यक्त होत आहे. चोरी, हाणामारी, चाकूहल्ले, हत्यांचे प्रकार, नशेचे वाढते व्यसन आणि युवकांची बेकायदेशीर धंद्याकडे होत असलेली ओढ यामुळे शहराची शांती ढासळली आहे. अशा स्थितीत काँग्रेसच्या नगराध्यक्षपदाच्या उमेदवार एकता प्रशांत समर्थ यांनी “शहरात पुन्हा कायदा-सुव्यवस्थेची ‘एकता’ प्रस्थापित करू” असा निर्धार व्यक्त केला आहे.
धक्कादायक घटनांची मालिका – मूल शहर हादरले
मूलमध्ये गेल्या काळात घडलेल्या काही गंभीर गुन्ह्यांनी शहरातील नागरिकांच्या सुरक्षेबाबत गंभीर प्रश्नचिन्ह निर्माण केले आहे—
- 13 ऑक्टोबर 2024 – रस्त्यावर टॅली ठेवण्याच्या किरकोळ वादावरून प्रेमचंद कांबळे या विद्यार्थ्याची निर्घृण हत्या.
- 28 डिसेंबर 2024 – शहराच्या मध्यवर्ती वर्दळीच्या ठिकाणी, पंचायत समिती कार्यालयासमोर रितिक अनिल शेंडे (24) या युवकाची तीन जणांनी चाकूने हत्या.
- 1 जुलै 2025 – प्रेमसंबंधांना विरोध केल्याने आरोपी गौरव नितीन नरुले याने थेट बिहारमधून आणलेली पिस्तूल व जिवंत काडतुसांसह प्रेयसीच्या हत्येचा प्रयत्न; पोलिसांनी वेळीच अटक केल्याने मोठा अनर्थ टळला.
- 27 सप्टेंबर 2025 – सेवानिवृत्त केंद्रप्रमुख सुनील गेडाम यांची हत्या करून त्यांचा मृतदेह टेकडीशेजारील नाल्यात टाकल्याने शहर दचकले.
गतवर्षी जिल्हा बँकेचे अध्यक्ष संतोष सिंह रावत यांच्यावर गोळीबार करून हत्येचा प्रयत्न झाला होता. गेल्या वर्षभरात चाकूने वार करून चार तरुणांचा बळी गेला आहे. ही आकडेवारीच शहरातील गुन्हेगारीची भीषणता स्पष्ट करण्यास पुरेशी आहे.
नशेच्या आहारी युवक – गुन्हेगारीस खतपाणी
मूल शहरातील युवकांमध्ये नशेचे प्रमाण चिंताजनक पातळीवर वाढले आहे.
दारू, गांजा आणि सहज पैसा कमावण्याच्या नादात अनेक तरुण अवैध धंद्यात गुंतत आहेत. शहरातील काही भागांत गांजा आणि अवैध दारू सहज उपलब्ध असल्याने विद्यार्थी देखील नशेच्या विळख्यात अडकत आहेत.
यामुळे घरांतील वातावरण बिघडत असून पालकही चिंतेत आहेत. याशिवाय जुगार, मटका व सट्ट्याच्या जाळ्यामुळे अनेकांचे संसार उध्वस्त झाले आहेत. अवैध धंद्यांना दिली जाणारी मौन मान्यता आणि हाताळणी नसल्याची भावना नागरिकांमध्ये व्यक्त होत आह.
महिलांची सुरक्षितता धोक्यात
गुन्हेगारी वाढल्याने महिलांमध्ये असुरक्षिततेची भावना निर्माण झाली आहे.
रात्री उशिरा प्रवास करणे, निर्जन भागातून जाणे किंवा बाजारपेठेतही बेछूट टोळक्यांच्या हालचालींमुळे महिला त्रस्त होत आहेत. सत्ताधाऱ्यांकडून महिलांच्या सुरक्षेसाठी परिणामकारक उपाययोजना न झाल्याने तीव्र नाराजी व्यक्त होत आहे.
काँग्रेसची भूमिका – एकता समर्थ यांचे आश्वासन
याच पार्श्वभूमीवर काँग्रेस पक्षाने कायदा-सुव्यवस्थेला प्राधान्य देत निवडणुकीची रणनीती आखली आहे. नगराध्यक्षपदाच्या उमेदवार एकता प्रशांत समर्थ यांनी स्पष्ट केले—
- शहरातील पसरत चाललेल्या गुन्हेगारीवर कठोर कारवाई
- अवैध धंद्यांचे निर्मूलन करण्यासाठी विशेष मोहीम
- महिलांसाठी सुरक्षित शहर उपक्रम
- युवकांना नशेमुक्तीसाठी मार्गदर्शन व पुनर्वसन उपक्रम
- स्मार्ट सीसीटीव्ही सर्व्हिलन्स सिस्टीम
- पोलिस व नगरपरिषद यांच्यात समन्वय वाढविणे
- तक्रारी तत्काळ नोंदविण्यासाठी नागरिक हेल्पलाईन
त्यांच्या मते, “मूल शहरात शांतता, सुरक्षितता आणि विकास हवा असेल तर प्रशासन पारदर्शक आणि बळकट असणे गरजेचे आहे.”
निष्कर्ष
मूल शहरात वाढती गुन्हेगारी, नशेचे सावट, हिंसक घटनांची मालिका आणि असुरक्षिततेची भावना या सर्वांनी शहराच्या भविष्यासमोर प्रश्नचिन्ह उभे केले आहे. नागरिक आता परिवर्तनाची अपेक्षा करत असून, काँग्रेसच्या एकता समर्थ या निवडणुकीत कायदा-सुव्यवस्थेला नवा आयाम देऊन शहरात स्थैर्य व सुरक्षितता प्रस्थापित करण्यास सज्ज आहेत.
